Xalqaro hamkorlik
DUNYO BILAN HAMKORLIKDA
Bahodir Jalolov nomidagi boksga ixtisoslashtirilgan sport maktabi xalqaro boks federatsiyalari bilan hamkorlik aloqalarini rivojlantirib, o'quvchilarni jahon darajasidagi tajriba bilan boyitmoqda.
Ozarbayjon
2025-yilning 3–15-may kunlari Ozarbayjonning Boku shahrida maktab o'smirlar terma jamoasi, Ozarbayjon va Gruziya o'smirlar milliy terma jamoalari ishtirokida qo'shma o'quv-mashg'ulot yig'ini o'tkazildi. Yig'in yakunida ikki davlatda boks sport turini va o'zaro do'stlik aloqalarini rivojlantirish bo'yicha hamkorlik memorandumi imzolandi.
Italiya
Maktab direktori Akbar Urazbayev Italiyaning eng qadimiy oliygohlaridan biri — 1361-yilda tashkil etilgan University of Pavia professorlari Matteo Alvaro va Andrea Penna bilan uchrashuv o'tkazdi. Uchrashuvda boks sportini yangi bosqichga olib chiqish, xalqaro tajribani joriy etish va hamkorlikni rivojlantirish masalalari muhokama qilindi. Tomonlar xorijlik mutaxassislarni jalb qilish, o'quvchi-sportchilar uchun o'quv-mashg'ulot yig'inlarini tashkil etish va mashg'ulotlarni xalqaro standartlar asosida yo'lga qo'yish bo'yicha kelishib oldilar.
Toshkent
O'zbekiston davlat sport akademiyasi huzuridagi malaka oshirish instituti bilan maktab o'rtasida o'zaro hamkorlik memorandumi imzolandi. Tomonlar keyingi 5 yil uchun trenerlarni qayta tayyorlash, o'quvchi-sportchilarni laboratoriya sharoitida tekshirish, Bahodir Jalolov ishtirokida mahorat darslari o'tkazish hamda uslubiy qo'llanmalar va testlar bankini yaratishda hamkorlik qilishga kelishdi. Memorandum boks yo'nalishida trenerlar tayyorlash tizimini mustahkamlashga xizmat qiladi.